Naxçıvanda hələ də bəstəkarın adına bir abidə yoxdur... - Tanınmış kinorejissordan Ramiz Mirişli ilə bağlı MÜRACİƏT

Anadil: “Bu il Azərbaycan bəstəkarlıq məktəbinin böyük nümayəndəsi, Azərbaycanın xalq artisti, əməkdar incəsənət xadimi, "Şöhrət" ordenli, professor Ramiz Mirişlinin 90 illik yubileyidir. O, böyük bəstəkar olmaqla yanaşı, həm də pedaqoji fəaliyyətlə məşğul olmuş, yeni musiqiçilər nəslinin yetişdirilməsi işinə dəyərli töhfələr vermişdir". Bu sətirlər Azərbaycan Kinematoqrafçılar İttifaqı İdarə Heyətinin üzvü, kinorejissor Tahir Tahiroviçin Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfliyə ünvanladığı müraciətdəndir.

Naxçıvanda hələ də bəstəkarın adına bir abidə yoxdur... - Tanınmış kinorejissordan Ramiz Mirişli ilə bağlı MÜRACİƏT

Tahir Tahiroviç

"Ramiz Mirişlinin yaradıcılığı çoxşaxəli olduğundan müxtəlif janrlarda bəstələdiyi əsərlər Azərbaycan musiqi xəzinəsinin dəyərli inciləridir. Bəstəkarın onlarla bədii, sənədli, cizgi filmlərinə yazdığı musiqləri, məşhur şairlərin sözlərinə bəstələdiyi mahnıları dillər əzbərinə çevrilib. Onun əsərləri Azərbaycanda və onun hüdudlarından kənarda doğma yurda məhəbbət və milli dəyərlərə ehtiram aşılamaqla yanaşı gənc nəslin vətənpərvərlik ruhunda tərbiyə olunmasında da mühüm əhəmiyyət kəsb edir. Bunlardan əlavə böyük pedaqoq olan Ramiz Mirişli Naxçıvan Dövlət Filarmoniyasının, Musiqi Kollecinin və Bəstəkarlar İttifaqının yaranmasının birbaşa təşşəbüskarı və yaradıcısıdır" deyə müraciət müəllifi vurğulayıb.

"Hörmətli Fuad müəllim, ulu Naxçıvan torpağı dünya elminə, ədəbiyyatına, sənətinə, ictimai-siyasi həyatına böyük şəxsiyyətlər bəxş etmiş bir yurd yeridir. Bütün bunlarla yanaşı etiraf etməliyik ki, Naxçıvanın bütün böyük şəxsiyyətləri sırasında bəstəkarlıq məktəbinin nəhəng nümayəndəsi var ki, o da Ramiz Mirişlidir" deyə qeyd edən Tahiroviç təəssüflə vurğulayıb ki, doğulub boya-başa çatdığı, uzun illər fəaliyyət göstərdiyi Naxçıvanda hələ də bəstəkarın adına bir abidə yoxdur: "Bu baxımdan, Azərbaycanın Ramiz Mirişlisinin Naxçıvan şəhərində anadan olduğu evinin qarşısında yerləşən, “Böyük bağ” kimi tanınan məkanda abidəsinin ucaldılması həm onun ruhuna sayğı, həm də qədirbilən xalqımız üçün hədiyyə olardı. İnanıram ki, təklifimi dəyərləndirəcək, böyük sənətkarın xatirəsinin əbədiləşdirilməsi istiqamətində bu təklifi dəstəkləyəcəksiniz”.


Anadil.az



Oxunub: 279
  • Sosial şəbəkədə paylaş
XƏBƏRDAR